KİV: ABŞ ordusu İranla müharibə zamanı “MQ-9 Reaper” PUA-larının təxminən 25 faizini itirib
Elpress.az xəbər verir ki, ABŞ Silahlı Qüvvələri İranla müharibə zamanı “MQ-9 Reaper” tipli pilotsuz uçuş aparatlarının əhəmiyyətli hissəsini itirib.“The Washington Post” qəzetinin ABŞ rəsmilərinə istinadən yaydığı məlumata görə, müharibə başlayandan bəri ABŞ ordusunun ən azı 45 “MQ-9 Reaper” PUA-sı sıradan çıxıb. Bu göstəricinin ölkənin həmin tipli PUA parkının təxminən 25 faizinə bərabər olduğu bildirilir. PUA-lar əsasən Hörmüz boğazı ətrafında istifadə olunub. Aşağı hündürlükdə və nisbətən aşağı sürətlə hərəkət edən bu aparatların İran və onun regiondakı müttəfiqləri üçün daha asan hədəfə çevrildiyi qeyd olunur.Qəzetin hesablamalarına görə, itirilən PUA-ların ümumi dəyəri 1,3 milyard dollardan çox ola bilər. Bununla belə, itkilərin hamısının vurulma nəticəsində baş vermədiyi, bəzi aparatların operatorlarla əlaqənin kəsilməsindən sonra qəzaya uğradığı bildirilir.
