ASCO və Dünya Bankı Xəzərdə külək enerjisi layihələrinin dəniz-logistika imkanlarını dəyərləndirib
Elpress.az xəbər verir ki, “AZCON Holding” şirkətlərindən olan “Azərbaycan Xəzər Dəniz Gəmiçiliyi” QSC-də (ASCO) Dünya Bankının ekspert nümayəndə heyəti ilə işgüzar görüş keçirilib. Görüşdə Xəzər dənizində həyata keçirilməsi planlaşdırılan külək enerjisi layihələrinin icrası zamanı tələb olunacaq dəniz-logistika xidmətləri və texniki təminat məsələləri geniş müzakirə edilib.Tərəflər ASCO-nun ixtisaslaşmış donanmasının imkanlarını, dənizdə külək enerjisi qurğularının tikintisi, quraşdırılması və istismarı prosesində istifadə oluna biləcək gəmi növlərini, eləcə də layihələrin müxtəlif mərhələlərində logistika həllərini dəyərləndiriblər.Görüş zamanı bildirilib ki, Xəzər dənizinin bərpaolunan enerji potensialından səmərəli istifadə olunması üçün müasir dəniz nəqliyyatı və logistika infrastrukturunun inkişafı mühüm əhəmiyyət daşıyır. Qeyd edilib ki, ixtisaslaşmış gəmi xidmətləri bu layihələrin vaxtında və səmərəli həyata keçirilməsində mühüm rol oynaya bilər.Müzakirələrdə qarşılıqlı maraq doğuran digər əməkdaşlıq istiqamətləri də nəzərdən keçirilib. Görüşdə Energetika Nazirliyi yanında Bərpa Olunan Enerji Mənbələri Dövlət Agentliyinin nümayəndəsi də iştirak edib.Səfər çərçivəsində Dünya Bankının ekspertləri ASCO-nun “Üç əsrin şahidi” muzeyini ziyarət edərək Azərbaycanın dənizçilik tarixi, Xəzər gəmiçiliyinin inkişaf mərhələləri və sahənin zəngin irsi ilə tanış olublar.
