Süni intellekt texnologiyalarının tətbiqi milli iqtisadiyyatların inkişafına mühüm töhfə versə də, bu proses sosial dayanıqlılığın qorunması və müvafiq sahələrdə davamlı islahatların həyata keçirilməsi baxımından xüsusi həssaslıq tələb edir. Bu məqsədlərə nail olmaq üçün strateji yanaşma, yüksək məsuliyyət və dəqiq hədəflərə yönəlmiş fəaliyyətin təmin edilməsi böyük əhəmiyyət daşıyır.
Elpress.az-ın Azərtac.az-a istinadən verdiyi məlumata əsasən, Naxçıvan Dövlət Universitetinin “Beynəlxalq ticarət və menecment” kafedrasının müdiri, iqtisad üzrə fəlsəfə doktoru, dosent Cavadxan Qasımovun sözlərinə görə, süni intellekt texnologiyalarının sürətli inkişafı yaxın illərdə xaricdə təhsil almağı planlaşdıran gənclər üçün yeni perspektivlər açacaq.O bildirib ki, süni intellektlə işləyən müasir platformalar tələbələrin akademik nailiyyətlərini, maraq dairələrini və fərdi bacarıqlarını təhlil edərək onlar üçün ən uyğun universitet və ixtisas seçimlərini müəyyənləşdirməyə imkan verəcək. Eyni zamanda, qəbul prosesində tələb olunan sənədlərin hazırlanması, motivasiya məktublarının tərtibi və xarici dil biliklərinin təkmilləşdirilməsi kimi istiqamətlərdə də bu texnologiyalardan geniş şəkildə faydalanmaq mümkün olacaq.Dosent əlavə edib ki, süni intellekt distant və fərdiləşdirilmiş təhsil imkanlarının inkişafına da mühüm töhfə verir. Onun fikrincə, tələbələr bu texnologiyalar vasitəsilə dünyanın aparıcı ali təhsil müəssisələrinin dərslərində onlayn iştirak edə, öz ehtiyaclarına uyğun fərdi tədris proqramlarından yararlana və real vaxt rejimində tərcümə xidmətləri əldə edə biləcəklər. Bu isə dil maneələrinin azalmasına və daha çox gəncin beynəlxalq təhsil imkanlarından istifadə etməsinə şərait yaradacaq.Bundan başqa, virtual laboratoriyalar və müxtəlif simulyasiya proqramları tələbələrin nəzəri biliklərini praktik bacarıqlarla möhkəmləndirəcək, onların qlobal əmək bazarının tələblərinə daha hazırlıqlı şəkildə uyğunlaşmasına dəstək olacaq.
