“Azərişıq” ASC-nin energetikləri Ankarada keçirilən beynəlxalq Peşə Ustalığı Yarışında “Ən təcrübəli mütəxəssis komandası” nominasiyası üzrə birinci yeri tutublar.
Elpress.az xəbər verir ki, sentyabrın 21-dən 25-dək baş tutan yarışda Azərbaycanla yanaşı, Türkiyə, Qazaxıstan, Qırğızıstan və Özbəkistan komandaları iştirak ediblər.
Azərbaycan təmsilçiləri texniki bilikləri, peşə bacarıqları və komanda işi ilə fərqlənərək qalib olublar.
Türkdilli ölkələrin energetikləri arasında bu yarış ilk dəfə 2023-cü ildə “Azərişıq” ASC-nin təşəbbüsü ilə Qarabağın Hadrut qəsəbəsində təşkil edilib. Sonrakı illərdə Tatarıstan, Qırğızıstan və Özbəkistanda keçirilən yarışlar elektroenergetika sahəsində təcrübə mübadiləsi və əməkdaşlıq üçün platformaya çevrilib.
Yarışın növbəti mərhələsinin 2027-ci ildə Qazaxıstanda keçirilməsi planlaşdırılır.
