Azərbaycanda fəaliyyət göstərən PAŞA Holding yaradılmasının 20-ci ildönümünü qeyd edir. İki onillik ərzində müxtəlif iqtisadi sahələrdə mövqeyini genişləndirən şirkətlər qrupu növbəti inkişaf mərhələsinin prioritetlərini də açıqlayıb.
Elpress.az xəbər verir ki, 2006-cı ildə fəaliyyətə başlayan holdinq hazırda maliyyə xidmətləri və texnologiya, daşınmaz əmlak, kənd təsərrüfatı, pərakəndə ticarət, əyləncə və digər sahələrdə təmsil olunur.
Qrupun beynəlxalq fəaliyyəti altı ölkəni əhatə edir və onun strukturunda 25 mindən çox əməkdaş çalışır. Holdinq “Bank of New York Mellon”, “Raiffeisen Bank International”, “McKinsey & Company”, “Boston Consulting Group”, “Marriott Bonvoy International”, “Four Seasons”, “Mandarin Oriental” və IE Universiteti kimi beynəlxalq qurum və şirkətlərlə əməkdaşlıq edir.
PAŞA Holding-in Baş icraçı direktoru Cəlal Qasımov 20 illik inkişaf yolunu dəyərləndirərkən bildirib ki, şirkətin uğuru yalnız maliyyə göstəriciləri və biznesin miqyası ilə ölçülməməlidir. Onun sözlərinə görə, uzunmüddətli dəyər yaratmaq, insanların etimadını qazanmaq, peşəkar kadrlar yetişdirmək və iqtisadiyyatın inkişafına töhfə vermək əsas hədəflər sırasındadır.
Qasımov növbəti mərhələdə texnologiya və innovasiyaların tətbiqinin, məlumatlara əsaslanan qərarvermənin, insan kapitalının inkişafının və korporativ idarəetmənin gücləndirilməsinin prioritet olacağını vurğulayıb.
Holdinq beynəlxalq bazarlardakı mövqeyini genişləndirməyi və uzunmüddətli investisiya imkanlarını dəyərləndirməyi də planlaşdırır.
