İstanbulun Qaziosmanpaşa rayonunda azərbaycanlı iş adamı Rövşən Zeynalov yaşadığı mənzildə ölü vəziyyətdə aşkarlanıb.
Elpress.az xəbər verir ki, məlumata görə, mənzildən gələn pis qoxudan narahat olan qonşular polisə məlumat veriblər. Hadisə yerinə polis əməkdaşları ilə yanaşı, yanğınsöndürənlər və təcili tibbi yardım briqadası cəlb olunub.Yanğınsöndürənlərin köməyi ilə mənzilin qapısı açılıb və içəri daxil olan polis əməkdaşları Rövşən Zeynalovun cansız bədənini aşkar ediblər.
Tibbi müayinə zamanı onun Azərbaycan vətəndaşı olduğu müəyyənləşdirilib.
Mənzildə Rövşən Zeynalovun bacısı Mətanət Zeynalova da olub. O, yataq otağında yatarkən aşkarlanıb və sağ vəziyyətdə olub. İlkin məlumata görə, psixi problemlərinin olduğu ehtimal edilən qadın vəfat etmiş qardaşı ilə təxminən bir həftə eyni mənzildə yaşayıb.
Mənzildə qan izlərinin də aşkarlandığı bildirilir. Rövşən Zeynalovun meyiti ölümün dəqiq səbəbinin müəyyənləşdirilməsi üçün məhkəmə-tibb ekspertizasına göndərilib.Hadisə ilə bağlı araşdırma aparılır.
Qeyd edək ki, əslən Qubadlı rayonundan olan Rövşən Zeynalovun Türkiyədə ayaqqabı biznesi ilə məşğul olduğu bildirilir.
