İyunun 11-də Baş nazir Əli Əsədovin rəhbərliyi ilə İqtisadi Şuranın növbəti iclası baş tutub. Görüş zamanı ölkənin iqtisadi inkişafı ilə bağlı mühüm məsələlər müzakirə olunub və qarşıda duran vəzifələr ətrafında fikir mübadiləsi aparılıb.
İqtisadi Şuranın iclasında Ələt Azad İqtisadi Zonasının fəaliyyətinin daha da səmərəli təşkili, qarşıda duran mühüm vəzifələr, infrastruktur sahəsində həlli vacib məsələlər, eləcə də zonanın gələcək inkişaf strategiyası və perspektivləri geniş şəkildə müzakirə olunub. Bununla yanaşı, xidmət sektorunun iqtisadi artım prosesində rolu, bu sahənin inkişaf imkanları, müəyyən edilmiş prioritet istiqamətlər və təqdim olunan təkliflər ətrafında ətraflı fikir mübadiləsi aparılıb.İclas zamanı Prezidentin köməkçisi – Prezident Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümovun, eləcə də iqtisadiyyat naziri Mikayıl Cabbarovun gündəlikdə yer alan məsələlərlə bağlı təqdimatları dinlənilib. Təqdimatlarda Ələt Azad İqtisadi Zonasının inkişafının sürətləndirilməsi, iqtisadi potensialının artırılması və xidmət sektorunda yeni imkanların yaradılması ilə bağlı əsas məqamlar diqqətə çatdırılıb.İqtisadi Şuranın üzvləri və Ələt Azad İqtisadi Zonasının İdarə Heyətinin sədri Valeh Ələsgərov müzakirə olunan məsələlərə dair çıxış edərək öz rəy və təkliflərini səsləndiriblər. Görüş çərçivəsində təqdim olunan təkliflər ətrafında geniş müzakirələr aparılıb, gələcək fəaliyyət istiqamətləri müəyyənləşdirilib.İclasın sonunda İqtisadi Şura üzvlərinin mövqeləri, irəli sürdükləri təkliflər və tövsiyələr nəzərə alınmaqla müvafiq qərarlar qəbul edilib. Həmçinin qarşıya qoyulan vəzifələrin icrası ilə bağlı aidiyyəti dövlət qurumlarına zəruri tapşırıqlar verilib.
