Daşınmaz əmlak bazarında qiymətlərin yüksəlməsi alıcıların seçimlərinə də təsir göstərib. Son dövrlər xüsusilə birotaqlı mənzillərə marağın artdığı müşahidə olunur.
Elpress.az FED.az-a istinadən xəbər verir ki, Rieltorlar Assosiasiyasının sədri, daşınmaz əmlak üzrə ekspert Elnur Fərzəliyevin sözlərinə görə, mənzil qiymətlərinin bahalaşması fonunda vətəndaşlar daha münasib qiymətə satılan kiçik sahəli mənzillərə üstünlük verirlər.
Ekspert bildirib ki, bir çox alıcı sonradan birotaqlı mənzilləri ikiotaqlıya çevirmək məqsədilə seçim edir. Lakin o, bu cür dəyişikliklərin ciddi təhlükələr yaratdığını vurğulayıb. Onun sözlərinə görə, mətbəxin eyvana və ya yaşayış otağına köçürülməsi layihə tələblərini pozur, bu isə qaz sızması və partlayış riskini artırır.
Elnur Fərzəliyev hesab edir ki, tikinti şirkətləri yeni yaşayış komplekslərində daha çox ekonom layihəli və kiçik sahəli mənzillərin inşasına üstünlük verməlidirlər. O qeyd edib ki, sovet dövründə tikilən binalarda birotaqlı mənzillərin sahəsi orta hesabla 30 kvadratmetr olduğu halda, yeni binalarda bu göstərici 50-70 kvadratmetrə qədər yüksəlib. Bu isə mənzilin ümumi dəyərinin, ilkin ödənişin və ipoteka öhdəliklərinin artmasına səbəb olur.
Ekspertin fikrincə, daha əlçatan mənzil layihələrinin artırılması xüsusilə gənc ailələrin və aztəminatlı vətəndaşların mənzil probleminin həllinə mühüm töhfə verə bilər.
Rəsmi statistikaya əsasən, 2026-cı ilin ikinci rübündə mənzil bazarında qiymətlər əvvəlki rüblə müqayisədə 1,6 faiz artıb. Yeni tikililərdə qiymətlər 2,6 faiz, təkrar mənzil bazarında isə 1,5 faiz yüksəlib. Ötən ilin eyni dövrü ilə müqayisədə isə ümumi bahalaşma 8,6 faiz təşkil edib. Yeni tikililərdə artım 12,4 faiz, köhnə mənzillərdə isə 8,6 faiz olub. Yanvar–iyun aylarının yekununda mənzil bazarında orta qiymət artımı 8,4 faiz səviyyəsində qeydə alınıb.
