Neftçala Rayon İcra Hakimiyyətinin başçısı Mirhəsən Seyidov Pirəbbə kəndində sakinlərlə növbəti səyyar qəbul-görüş keçirərək onların müraciət və təkliflərini dinləyib.
Neftçala Rayon İcra Hakimiyyətinin başçısı Mirhəsən Seyidovun Pirəbbə kənd sakinləri ilə keçirdiyi növbəti səyyar qəbul zamanı vətəndaşların sosial və məişət məsələləri ilə bağlı müraciətləri dinlənilib, onları narahat edən problemlər ətraflı şəkildə müzakirəyə çıxarılıb.Görüşdə Şorkənd-Beştalı-Bankə-Şirvanlı avtomobil yolunun əsaslı təmiri və yolboyu dayanacaqların quraşdırılması, torpaq sahələri ilə təmin olunma, yaşayış evlərinin təmirinə dəstək göstərilməsi, elektrik təsərrüfatının yenilənməsi, Bucaq suvarma kanalının lildən təmizlənərək istifadəyə yararlı vəziyyətə gətirilməsi, Neftçala rayon Müşfiq Babayev adına Pirəbbə kənd ümumi orta məktəbinin fəaliyyətinin davam etdirilməsi üçün köməklik göstərilməsi, kəndlərarası marşrut xəttinin bərpası, örüş təyinatlı torpaqların kateqoriyasının dəyişdirilərək daha səmərəli istifadəsinin təmin edilməsi və digər mühüm sosial məsələlərlə bağlı sakinlərin təklif və müraciətləri səsləndirilib.Qaldırılan hər bir məsələ diqqətlə nəzərdən keçirilib, vətəndaşların müraciətləri ayrı-ayrılıqda dinlənilərək aidiyyəti üzrə geniş müzakirələr aparılıb. Səsləndirilən problemlərin həlli istiqamətində müvafiq qurumlara tapşırıqlar verilib, məsələlərin icra vəziyyətinin nəzarətdə saxlanılacağı bildirilib.Sakinlər göstərilən diqqət və qayğıya, onların müraciətlərinə həssas yanaşılmasına, eləcə də Neftçala rayonunda həyata keçirilən abadlıq, quruculuq və sosial layihələrə görə Azərbaycan Respublikasının Prezidenti İlham Əliyevə və Birinci vitse-prezident Mehriban xanım Əliyevaya təşəkkür və minnətdarlıqlarını ifadə ediblər.
