Forumun yekununda iki ölkə arasında enerji əməkdaşlığına dair protokol imzalanıb
Elpress.az xəbər verir ki, Bakıda Azərbaycan-Türkiyə 5-ci Enerji Forumu keçirilib. Tədbir çərçivəsində iki ölkə arasında enerji sahəsində əməkdaşlığın genişləndirilməsi ilə bağlı müzakirələr aparılıb və forumun yekunlarına dair protokol imzalanıb.Sənədi Azərbaycanın energetika naziri Pərviz Şahbazov və Türkiyənin energetika və təbii sərvətlər naziri Alparslan Bayraktar imzalayıblar.Forum çərçivəsində karbohidrogen və neft-kimya, elektrik enerjisi bazarı, elektrik enerjisinin ötürülməsi və paylanması, enerji səmərəliliyi, bərpa olunan enerji, tənzimləmə və mədənçilik istiqamətləri üzrə altı İşçi Qrupunun iclasları keçirilib.Müzakirələr zamanı təbii qaz tədarükü, qaz infrastrukturu, rəqəmsallaşma, elektrik bazarının tənzimlənməsi, interkonnektor bağlantıları, enerji saxlancı, ağıllı sayğaclar və karbon tənzimləmə mexanizmləri üzrə əməkdaşlığın inkişaf etdirilməsi məsələləri nəzərdən keçirilib.Tərəflər həmçinin yaşıl enerjinin ixracı, dənizdə külək enerjisi, bərpa olunan enerji layihələrinə investisiya və icazə prosedurları, günəş və külək enerjisinin şəbəkəyə inteqrasiyası, enerji səmərəliliyi və kadr hazırlığı sahələrində əməkdaşlığın genişləndirilməsi barədə razılığa gəliblər.Enerji səmərəliliyi istiqamətində isə enerji auditləri, ESCO bazarının inkişafı, enerji menecerlərinin hazırlanması, binaların enerji pasportlaşdırılması, maliyyələşdirmə mexanizmlərinin təkmilləşdirilməsi, emissiyaların hesablanması və proseslərin rəqəmsallaşdırılması ilə bağlı bir sıra tədbirlərin həyata keçirilməsi nəzərdə tutulub.Azərbaycan-Türkiyə Enerji Forumunun ilk toplantısı 2021-ci ildə Bakıda keçirilib. Sonrakı forumlar İstanbul, Naxçıvan və İzmir şəhərlərində təşkil olunub.
