Yeni Azərbaycan Partiyası Türkiyənin siyasi dairələrində Azərbaycanla bağlı səsləndirilən açıqlamalara etiraz edib və rəsmi Ankaranı ikitərəfli münasibətlərə xələl gətirə biləcək bəyanatlardan çəkinməyə çağırıb.
Elpress.az xəbər verir ki, partiyanın Mətbuat xidmətinin yaydığı bəyanatda Türkiyə Prezidentinin baş müşaviri Oktay Saralın və hakim Ədalət və İnkişaf Partiyasının (AKP) bəzi deputatlarının fikirləri tənqid olunub.
YAP hesab edir ki, Türkiyə mediasında və sosial şəbəkələrdə Azərbaycanla bağlı qərəzli məlumatların yayılması son dövrlərdə daha sistemli xarakter alıb. Bəyanatda vurğulanıb ki, iki ölkə arasındakı tarixi dostluq və siyasi tərəfdaşlıq qarşılıqlı hörmətə, suverenliyə və daxili işlərə qarışmamaq prinsipinə əsaslanmalıdır.
Partiya “Bir millət, iki dövlət” prinsipinin mahiyyətinin təhrif edilməsinin yolverilməz olduğunu bildirib. Qeyd olunub ki, bu ifadə Azərbaycan və Türkiyənin müstəqil dövlətlər kimi bərabərhüquqlu münasibətlərini nəzərdə tutur.
Açıqlamada Azərbaycanın dünyəvi dövlət quruluşu, dini etiqad azadlığı və təhsil siyasəti ilə bağlı məsələlərin siyasi manipulyasiya vasitəsinə çevrilməsinə də etiraz edilib. YAP vurğulayıb ki, ölkədə bütün dinlərin nümayəndələrinə bərabər münasibət göstərilir, dini müxtəliflik isə cəmiyyətin zənginliyi kimi qiymətləndirilir.
Bəyanatda Azərbaycanın Fələstin məsələsindəki mövqeyinə də toxunulub. Bildirilib ki, Bakı Fələstin xalqının qanuni hüquqlarını dəstəkləyir, münaqişənin beynəlxalq hüquq və BMT qətnamələri əsasında, paytaxtı Şərqi Qüds olmaqla iki dövlət prinsipi çərçivəsində həllini müdafiə edir.
YAP İslam dünyasında həmrəyliyin bərabərhüquqlu əməkdaşlıq və qarşılıqlı hörmət üzərində qurulmasının vacibliyini qeyd edib. Partiya Türkiyənin siyasi dairələrini Azərbaycanla bağlı açıqlamalarda məsuliyyətli mövqe tutmağa və iki ölkə arasındakı münasibətlərə zərər vura biləcək addımlardan çəkinməyə çağırıb.
