Ağdam Sənaye Parkındakı fabrik xarici ölkələrə ayaqqabı ixrac edir
Elpress.az xəbər verir ki, İşğaldan azad edilmiş Ağdamda sənaye və istehsal sahələrinin inkişafı davam edir. Ağdam Sənaye Parkında fəaliyyət göstərən müəssisələr həm regionun iqtisadi fəallığının artmasına, həm də yerli əhalinin məşğulluğunun təmin olunmasına töhfə verir.Parkın rezidenti olan “BAFCO İnvest” MMC-nin ayaqqabı fabrikində hazırda 20-yə yaxın model istehsal olunur. Müəssisədə müxtəlif rəng və təyinatlı poliuretan çəkmələr də hazırlanır.Fabrikdə istehsal olunan məhsullar daxili bazarla yanaşı, xarici ölkələrə də göndərilir. İndiyədək Birləşmiş Ərəb Əmirlikləri, Rusiya və Qazaxıstana ixrac həyata keçirilib. Müəssisə yaxın gələcəkdə Avropa və Yaxın Şərq ölkələrinə satış imkanlarını genişləndirməyi planlaşdırır.Müəssisədə 70-dən çox əməkdaş çalışır. İşçilərin böyük hissəsini Ağdam və ətraf rayonların sakinləri təşkil edir. Fabrikin illik istehsal gücü xüsusi təyinatlı ayaqqabılar üzrə 360 min cüt, poliuretan çəkmələr üzrə isə 150 min cütdür.Ağdam Sənaye Parkında həyata keçirilən bu cür layihələr azad edilmiş ərazilərdə yalnız yeni istehsal müəssisələrinin yaradılmasına deyil, həm də iqtisadi həyatın canlanmasına və əhalinin məşğulluğunun artmasına şərait yaradır.
