Kommersiya uçuşlarında heyətin iş və uçuş saatlarına yeni limitlər müəyyənləşir
Elpress.az xəbər verir ki, Kommersiya hava daşımalarında çalışan təyyarə heyətinin iş, uçuş və istirahət vaxtlarının beynəlxalq standartlara uyğun tənzimlənməsi təklif olunur.Qanun layihəsi Milli Məclisin Əmək və sosial siyasət komitəsinin iclasında müzakirəyə çıxarılıb. Təklif olunan dəyişikliklərə əsasən, hava gəmisi heyətinin iş vaxtı 7, 14 və 28 ardıcıl gün, eləcə də bir təqvim ili üzrə müəyyən ediləcək.Uçuş vaxtı üçün isə 28 ardıcıl gün, bir təqvim ili və ardıcıl 12 təqvim ayı üzrə maksimal hədlərin tətbiqi nəzərdə tutulur.Layihənin əsas məqsədi aviasiya heyətinin iş və istirahət rejimini yorğunluğun idarə edilməsi üzrə beynəlxalq standartlara uyğunlaşdırmaqdır. Bununla əlaqədar Əmək Məcəlləsində nəzərdə tutulan ümumi iş vaxtı normalarından aviasiya sahəsi üçün istisnaların müəyyənləşdirilməsi və müvafiq qaydaların Nazirlər Kabineti tərəfindən təsdiqlənməsi təklif edilir.Qeyd olunub ki, mövcud iş vaxtı məhdudiyyətləri 13-14 saat davam edən uzaq məsafəli uçuşların təşkilində çətinliklər yarada bilər. Yeni tənzimləmələrin isə yerli aviaşirkətlərin rəqabət imkanlarını artıracağı və uçuş istiqamətlərinin genişləndirilməsinə şərait yaradacağı gözlənilir.
