Emil Əliyev növbəti dəfə Rusiya Mini-Futbol Assosiasiyasının (AMFR) prezidenti seçilib.
Elpress.az xəbər verir ki, qərar avqustun 7-də Moskvada keçirilən təşkilatın hesabat-seçki konfransında qəbul olunub.
Bildirilib ki, Emil Əliyev daha beş il AMFR-ə rəhbərlik edəcək. O, 2011-ci ildən assosiasiyanın prezidenti vəzifəsini icra edir və bu müddət ərzində nümayəndələrin dəstəyini bir neçə dəfə qazanıb.
Əliyev daha əvvəl 2016 və 2021-ci illərdə də yenidən prezident seçilib. 2026-cı ildə keçirilən hesabat-seçki konfransında isə onun namizədliyi növbəti beşillik müddət üçün dəstəklənib.
Konfrans zamanı AMFR-in vitse-prezidentləri və İcra Komitəsinin üzvləri də müəyyənləşdirilib. Tədbirdə regionlardan nümayəndələr, tərəfdaşlar, mini-futbol və Rusiya milli komandasının veteranları iştirak ediblər.
Qeyd edək ki, Emil Əliyev əslən azərbaycanlıdır. O, 1978-ci ildə Bakıda anadan olub. Pedaqoji elmlər doktoru və professordur. Əliyev bədən tərbiyəsi və idman sahəsində bir sıra elmi əsərlərin və monoqrafiyaların müəllifidir.
