Şəkinin kəndlərində güclü yağışlardan sonra torpaqlarda ciddi eroziya və deqradasiya prosesləri müşahidə olunub, əkin sahələrinə ziyan dəyib.
Elpress.az-ın Azərtac.az-a istinadən verdiyi məlumata əsasən, Azərbaycan Milli Elmlər Akademiyasının Şəki Regional Elmi Mərkəzinin Ekoloji coğrafiya şöbəsinin müdiri, coğrafiya üzrə fəlsəfə doktoru Qafqaz Ağabalayev, elmi işçilər Aqil Mustafayev, Elvin Rüstəmov və şöbənin əməkdaşı Elvin Qarayev tərəfindən Baş Layısqı və Cunud kəndlərində intensiv yağıntıların yaratdığı ekoloji fəsadların qiymətləndirilməsi məqsədilə monitorinq aparılıb.Tədqiqat zamanı ərazilərdə eroziya prosesləri, torpaq örtüyünün deqradasiyası və səth yuyulmalarının miqyası araşdırılıb. Müşahidələr əsasən Şin və Baş Layısqı kəndləri arasındakı sahədə, kəndin giriş hissəsində və Şəhidlər xiyabanı ətrafında aparılıb. Nəticələr güclü su eroziyasının aktiv olduğunu, bəzi yerlərdə 4 metrdən çox dərin yuyulmaların əmələ gəldiyini və yeni dərə yataqlarının formalaşdığını göstərib.Eyni zamanda Cunud kəndinin hər iki giriş istiqamətində də eroziya prosesləri izlənilib və geomorfoloji dəyişikliklərin qiymətləndirilməsi üçün ölçmə işləri həyata keçirilib.
