Abşeron rayonunun Məmmədli kəndində yerləşən yanacaqdoldurma məntəqəsinin ərazisində baş verən yanğın qısa müddətdə söndürülüb.
Elpress.az xəbər verir ki, bu barədə Fövqəladə Hallar Nazirliyi məlumat yayıb.Məlumata görə, hadisə ilə bağlı daxil olan məlumatdan sonra əraziyə dərhal Dövlət Yanğından Mühafizə Xidmətinin qüvvələri cəlb edilib.
İlkin araşdırma zamanı yanğının yanacaqdoldurma məntəqəsinin ərazisində yerləşən, avtomobil təmiri sexi və ehtiyat hissələri mağazası kimi fəaliyyət göstərən 8 boksdan ibarət obyektlərdə baş verdiyi müəyyən edilib.Yanğınsöndürənlərin operativ müdaxiləsi nəticəsində alovun digər bokslara və yanacaqdoldurma məntəqəsinə keçməsinin qarşısı alınıb.
Hadisə nəticəsində iki boksun yanar konstruksiyaları 60 kvadratmetr, dam örtüyünün taxta atmaları isə 260 kvadratmetr sahədə yanıb.Yanğın zamanı xəsarət alan olmayıb. Digər obyektlər və yanacaqdoldurma məntəqəsi yanğından mühafizə edilib.
