Müayinə nəticələrinə təsir göstərəcəklərini vəd edən sabiq hərbçilər hakim qarşısına çıxarılıb
Elpress.az xəbər verir ki, Hərbi qulluqçuların tibbi müayinə nəticələrinə müdaxilə edə biləcəklərini vəd edərək onlardan pul aldığı bildirilən iki sabiq hərbçi barəsində məhkəmə hökmü çıxarılıb. Tural Nuriyev və Əsəd Əliyev dörd hərbçiyə qarşı dələduzluqda təqsirləndirilib. Cinayət işinə Bakı Hərbi Məhkəməsində hakim Zeynal Ağayevin sədrliyi ilə baxılıb.Məhkəmənin qərarı ilə Əsəd Əliyev 2 il müddətinə azadlıqdan məhrum edilib və hökm elan olunan zaman məhkəmə zalında həbs olunub. Tural Nuriyev isə 4 min manat məbləğində cərimələnib.İttihama əsasən, Ə.Əliyev tanıdığı hərbçinin telefon danışığından onun və digər xidmət yoldaşlarının narkoloji müayinədən keçirildiyini, həmçinin əvvəl narkotik vasitələrdən istifadə etdiklərinin analizlər zamanı üzə çıxacağından narahat olduqlarını öyrənib.Bundan sonra həmin şəxslərin narahatlığından istifadə edərək qanunsuz gəlir əldə etmək qərarına gəlib. O, bu barədə yoluxucu xəstəliklər ixtisası üzrə rezidentura təhsili alan hərbçi tanışı T.Nuriyevlə əlaqə saxlayıb.İttihamda göstərilir ki, hər iki şəxs hərbçilərə analiz nəticələrinə təsir göstərə biləcəklərini vəd edərək onlardan ümumilikdə 10 min manata yaxın pul alıb.Daha sonra zərərçəkənlər aldadıldıqlarını anlayaraq hüquq-mühafizə orqanlarına müraciət ediblər. Faktla bağlı Bakı Hərbi Prokurorluğunda cinayət işi başlanıb.Tural Nuriyev və Əsəd Əliyev qabaqcadan əlbir olan qrup tərəfindən, qulluq mövqeyindən istifadə etməklə və xeyli miqdarda ziyan vurmaqla dələduzluq etməkdə təqsirli biliniblər.
