Gədəbəydə 1992-ci ildə törədilən qətlin üstü açılıb
Elpress.az xəbər verir ki, Gədəbəydə uzun illər əvvəl baş vermiş qətl hadisəsi yenidən araşdırılaraq açılıb. Cinayətin törədilməsindən 34 il sonra şübhəli şəxs müəyyən edilərək saxlanılıb.Gədəbəy rayon prokurorluğu və Rayon Polis Şöbəsinin əməkdaşlarının birgə keçirdiyi istintaq və əməliyyat-axtarış tədbirləri nəticəsində 1992-ci ildə baş vermiş qəsdən adam öldürmə cinayətinin üstü açılıb.Müəyyən edilib ki, 1992-ci il mayın 31-də Turşsu kəndi yaxınlığındakı “Bəkdəmir yalı” ərazisində üzərində zorakılıq izləri olan Şahbaz Məmmədovun meyiti aşkarlanıb. Faktla bağlı həmin dövrdə cinayət işi başlanıb, lakin hadisəni törədən şəxsin müəyyənləşdirilməsi mümkün olmadığından istintaq 1993-cü ildə dayandırılıb.Cinayət işinin və onunla bağlı əməliyyat materiallarının yenidən araşdırılması zamanı əlavə istintaq tədbirlərinin aparılmasına ehtiyac olduğu müəyyənləşdirilib. Bu səbəbdən avqustun 28-də iş üzrə icraat təzələnib.Aparılan araşdırmalar nəticəsində məlum olub ki, Şahbaz Məmmədovu onun oğlu, 1969-cu il təvəllüdlü Polad Məmmədov öldürüb. İstintaqın ilkin nəticələrinə əsasən, P.Məmmədov 1992-ci ilin mayında atasının baş nahiyəsinə bir neçə dəfə ağac parçası ilə zərbə endirərək onu qəsdən öldürüb.Daha sonra cinayətin izlərini gizlətmək və hadisənin başqa yerdə baş verdiyi görüntüsü yaratmaq üçün meyiti evlərinin yaxınlığındakı “Bəkdəmir yalı” ərazisinə aparıb.Polad Məmmədov dindirmə zamanı törətdiyi cinayəti etiraf edib və avqustun 31-də şübhəli şəxs qismində tutulub. Onun əməli həmin dövrdə qüvvədə olan Cinayət Məcəlləsinin müvafiq maddəsi ilə ağırlaşdırıcı hallarda qəsdən adam öldürmə kimi tövsif edilib.Hazırda cinayət işi üzrə ibtidai istintaq davam etdirilir. Hüquq-mühafizə orqanları əvvəlki illərdə törədilmiş və açılmamış cinayətlərin araşdırılması istiqamətində tədbirləri davam etdirir.
