Fransanın paytaxtında keçirilən kütləvi aksiyalar zamanı mağazalara, bankomatlara və küçə infrastrukturuna ziyan vurulub, nümayişçilərlə polis arasında toqquşmalar baş verib.
Elpress.az xəbər verir ki, yayılan məlumatlara görə, Parisin Madjenta bulvarında mağazaların vitrinləri və bankomatlar dağıdılıb. Etirazçılar həmçinin ictimai nəqliyyat dayanacaqlarını, zibil qutularını və küçədəki avtomobilləri yandırıblar.
Gərginlik Respublika meydanında, yürüş başlamazdan əvvəl yaranıb. Nümayişçilərin hüquq-mühafizə əməkdaşlarına daş, şüşə butulka və yandırıcı maddələr atdığı, polisin isə gözyaşardıcı qaz və səs qumbaralarından istifadə etdiyi bildirilir.
Etirazların yanacağın bahalaşması və əhalinin alıcılıq qabiliyyətinin azalması ilə əlaqədar keçirildiyi qeyd olunur. Oxşar toqquşmaların Lion və Fransanın digər böyük şəhərlərində də yaşandığı bildirilir.
