Şəmkir rayonunda fərdi yaşayış evində baş verən yanğın Fövqəladə Hallar Nazirliyinin əməkdaşları tərəfindən qısa müddətdə söndürülüb.
Elpress.az xəbər verir ki, FHN-in “112” qaynar telefon xəttinə rayonun Zəyəm Cırdaxan kəndində yerləşən ikimərtəbəli fərdi yaşayış evində yanğın baş verməsi barədə məlumat daxil olub.
Hadisə yerinə dərhal Dövlət Yanğından Mühafizə Xidmətinin Şəmkir Rayon Yanğından Mühafizə Hissəsinin qüvvələri cəlb olunub. Yanğınsöndürənlərin operativ müdaxiləsi nəticəsində alovun genişlənməsinin qarşısı alınaraq yanğın qısa müddətdə söndürülüb.Yanğın nəticəsində ümumi sahəsi 500 kvadratmetr olan evin birinci mərtəbəsində bir otağın yanar konstruksiyaları 70 kvadratmetr, ikinci mərtəbəsində isə bir otağın tavanı 20 kvadratmetr sahədə yanıb. Bundan başqa, evə bitişik ümumi sahəsi 400 kvadratmetr olan talvarın və həyətyanı sahədə yerləşən 100 kvadratmetrlik köməkçi tikilinin yanar konstruksiyaları da alovdan zərər görüb.
Hadisə zamanı xəsarət alan olmayıb. Evin qalan hissəsi yanğından mühafizə edilib. Yanğının başvermə səbəbi araşdırılır.
