Qarabağ müharibələrində itkin düşənlərin axtarışı: 328 şəxsin kimliyi müəyyənləşdirilib
Elpress.az xəbər verir ki, Birinci və İkinci Qarabağ müharibələri zamanı itkin düşmüş şəxslərin taleyinin müəyyənləşdirilməsi istiqamətində aparılan işlər davam etdirilir.Əsir və itkin düşmüş, girov götürülmüş vətəndaşlarla əlaqədar Dövlət Komissiyasının yaydığı icmal məlumatına əsasən, 2026-cı ilin avqust ayında daha 5 insan qalığı aşkar edilərək ekshumasiya olunub. Bununla da indiyədək ekshumasiya edilmiş insan qalıqlarının sayı 910-a yüksəlib.Aparılan DNT və məhkəmə-tibbi ekspertizalar nəticəsində kimliyi müəyyən edilən 21 şəxsin qalıqları ailələrinə təhvil verilib və onlar dəfn olunublar. Beləliklə, ailələrinə təhvil verilərək dəfn edilən qalıqların ümumi sayı 267-yə çatıb.Hazırda DNT və məhkəmə-tibbi üsullarla kimliyi müəyyənləşdirilmiş itkin şəxslərin sayı 328-dir.Məlumata görə, indiyədək ölkə ərazisində 32 kütləvi dəfn yeri də aşkarlanıb. Dövlət Komissiyası itkin şəxslərin axtarılması, qalıqların müəyyən edilərək ekshumasiya olunması, identifikasiyası və ailələrinə təhvil verilməsi üzrə fəaliyyətini davam etdirir.
