Azərbaycanın elm və ali təhsil müəssisələrinin nümayəndələri III Türk Dünyası Yay Forumunda iştirak ediblər
Elpress.az xəbər verir ki , Türkiyənin İstanbul şəhərində keçirilən III Türk Dünyası Yay Forumu bu il də dünyanın müxtəlif ölkələrindən alimləri, tədqiqatçıları və dövlət rəsmilərini bir araya gətirib. İbn Haldun Universitetinin Heydər Əliyev Avrasiya Araşdırmaları Mərkəzinin təşkilatçılığı ilə keçirilən forum Türk Dövlətləri Təşkilatı (TDT), TİKA və YTB-nin tərəfdaşlığı ilə baş tutub.Artıq ənənəvi beynəlxalq akademik platformaya çevrilən tədbirdə 26 ölkədən 150-yə yaxın alim, ekspert, siyasətçi və dövlət rəsmisi iştirak edib. Forum çərçivəsində Türk dünyasının siyasi, iqtisadi, təhlükəsizlik, təhsil, mədəniyyət və regional əməkdaşlıq məsələləri geniş müzakirə olunub.Azərbaycan tədbirdə AMEA, Bakı Dövlət Universiteti, Xəzər Universiteti və ADA Universitetinin alim və tədqiqatçılarından ibarət geniş akademik heyətlə təmsil olunub. Forumun açılış mərasimində TDT rəhbərliyi, İbn Haldun Universitetinin nümayəndələri və müxtəlif ölkələrdən olan elm adamları iştirak edərək akademik əməkdaşlığın genişləndirilməsinin vacibliyini vurğulayıblar.Tədbir çərçivəsində Xəzər Universitetinin Siyasi elmlər və fəlsəfə departamentinin müdiri, dosent Orxan Vəliyev “Milli inteqrativ siyasət kontekstində Cənubi Qafqazın yenidən dəyərləndirilməsi: Azərbaycan nümunəsi” mövzusunda məruzə ilə çıxış edib. Məruzədə Azərbaycanın postmünaqişə dövründə regionda oynadığı strateji rol və inteqrasiya siyasəti elmi baxımdan təhlil olunub.Bununla yanaşı, SOCAR Türkiyənin Baş icraçı direktoru Elçin İbadov Türk dünyasında enerji əməkdaşlığı, iqtisadi inteqrasiya və elmi-tədqiqat layihələrinin inkişafı barədə iştirakçılara məlumat verib. Forum iştirakçıları həmçinin Türk Dövlətləri Təşkilatının İstanbuldakı qərargahını ziyarət edərək ali təhsil və akademik əməkdaşlığın gələcək perspektivləri ilə bağlı fikir mübadiləsi aparıblar.
