Azərbaycanda avtonom nəqliyyat dövrü başlayır: Sürücüsüz avtobus, metro və yük avtomobillərinin istifadəsinə icazə verilir
Elpress.az xəbər verir ki, Azərbaycanda qanunvericiliyə edilən dəyişikliklərlə avtonom (sürücüsüz) nəqliyyat vasitələrinin istifadəsi üçün hüquqi baza formalaşdırılıb. Yeniliklərə əsasən, sürücüsüz avtobuslar, metro qatarları, avtonom yük nəqliyyatları, habelə uzaqdan idarə olunan tramvay və dəmir yolu sistemləri qanuni şəkildə fəaliyyət göstərə biləcək. Bu nəqliyyat vasitələri yalnız dövlət qeydiyyatından keçdikdən və səlahiyyətli qurumların müəyyən etdiyi xüsusi ərazilərdə istismara buraxılacaq.Nəqliyyat vasitəsində sürücü olmasa da, xüsusi operator məsafədən idarəetmə mərkəzindən sistemi izləyəcək və zərurət yarandıqda müdaxilə edəcək. Sistemlərdən əldə olunan məlumatlar real vaxt rejimində dövlət informasiya sistemlərinə ötürülərək ən azı 6 ay saxlanılacaq. Həmçinin bu nəqliyyat vasitələri üçün xüsusi “Avtonom nəqliyyat vasitəsi” tanınma nişanı da tətbiq ediləcək.
