Heydər Əliyev Beynəlxalq Aeroportu 2026-cı ilin ilk yarısında 3,3 milyondan çox sərnişinə xidmət göstərib və hazırda 76 istiqamət üzrə müntəzəm reyslər həyata keçirir.
Elpress.az xəbər verir ki, 2026-cı ilin birinci yarısında qlobal aviasiya sektorunda müşahidə olunan geosiyasi gərginliklərə və bir sıra hava məkanlarında tətbiq edilən məhdudiyyətlərə baxmayaraq, Azərbaycan aviasiyası sabit fəaliyyətini qoruyub. Hesabat dövründə Heydər Əliyev Beynəlxalq Aeroportu ümumilikdə 3,334 milyon sərnişinə və 26 781 reysə xidmət göstərib. Sərnişinlərin təxminən 2,96 milyonu beynəlxalq istiqamətlər üzrə səyahət edib.İlk yarımildə transfer sərnişinlərinin sayında da əhəmiyyətli artım qeydə alınıb. Belə ki, hava limanı vasitəsilə 275 mindən çox transfer sərnişin daşınıb ki, bu da ötən ilin eyni dövrü ilə müqayisədə 40 faizdən çox artım deməkdir.Hazırda hava limanında tam xidmət göstərən, aşağıbüdcəli və hibrid model əsasında fəaliyyət göstərən ümumilikdə 40 aviaşirkət sərnişinlərə xidmət göstərir. “Air Serbia” və “FlyOne Asia” aviaşirkətlərinin fəaliyyətə başlaması marşrut şəbəkəsinin daha da genişlənməsinə imkan yaradıb və Bakıdan 76 istiqamət üzrə müntəzəm reyslər həyata keçirilir.Bundan əlavə, ilin ilk altı ayında Azərbaycanın hava məkanında 180 mindən çox uçuşa aeronaviqasiya xidməti göstərilib. Tranzit uçuşların sayı 14,4 faiz artaraq 143 mini ötüb. Bu göstəricilər Azərbaycanın regional aviasiya və aeronaviqasiya mərkəzi kimi mövqeyinin daha da möhkəmləndiyini nümayiş etdirir.
