Xırdalan bələdiyyəsinin sabiq sədri Orxan Musayev barəsində aparılan cinayət işinin istintaqı başa çatıb və iş məhkəməyə göndərilib.
Elpress.az-ın Milli.az-a istinadən verdiyi məlumata əsasən, Azərbaycan Respublikasının Baş Prokurorluğu yanında Korrupsiyaya qarşı Mübarizə Baş İdarəsində aparılan istintaq zamanı müəyyən olunub ki, Orxan Musayev 2020–2025-ci illərdə Xırdalan bələdiyyəsinin sədri vəzifəsində çalışarkən vəzifə səlahiyyətlərindən sui-istifadə edib. İstintaqın qənaətinə görə, o, bələdiyyəyə məxsus 1,92 hektar torpaq sahəsini 75 nəfərə qanunvericilikdə nəzərdə tutulan qiymətdən aşağı məbləğə satmaqla bələdiyyəyə 600 min manatdan artıq ziyan vurub.Araşdırma zamanı onun vəzifə mövqeyindən istifadə etməklə etibar edilmiş külli miqdarda bələdiyyə əmlakını mənimsədiyi və israf etdiyi, həmçinin tamah niyyəti ilə rəsmi sənədlərə bilərəkdən yalan məlumatlar daxil edərək vəzifə saxtakarlığı törətdiyi də müəyyən edilib.Toplanmış sübutlar əsasında Orxan Musayevə Azərbaycan Respublikası Cinayət Məcəlləsinin külli miqdarda mənimsəmə, vəzifə səlahiyyətlərindən sui-istifadə və vəzifə saxtakarlığı maddələri ilə ittiham irəli sürülüb. Onun barəsində polisin nəzarəti altına vermə qətimkan tədbiri seçilib. Cinayət işi baxılması üçün Sumqayıt Ağır Cinayətlər Məhkəməsinə göndərilib.
