Taksi sürücülərinin digər şəhərdən geri qayıdarkən sərnişin götürə bilməməsi həm sürücülərə, həm də sərnişinlərə təsir edir
Elpress.az xəbər verir ki, Bakı-Sumqayıt marşrutu üzrə taksi fəaliyyəti zamanı tətbiq olunan qaydalar sərnişin və sürücülər arasında narazılığa səbəb olub.Mövcud tələblərə əsasən, taksinin buraxılış kartı hansı şəhər üzrə verilibsə, sürücü digər şəhərdə sərnişin götürə bilmir. Bu səbəbdən Bakıdan Sumqayıta sərnişin aparan taksilər geri qayıdarkən boş hərəkət etməli olur. Nəticədə sürücülər əlavə yanacaq və vaxt itkisi ilə üzləşir, sərnişinlər isə əks istiqamətdə taksi tapmaqda çətinlik çəkə və daha yüksək gediş haqqı ödəyə bilirlər.Nəqliyyat eksperti Aslan Əsədov bildirib ki, problemin həlli zamanı gediş haqlarının müəyyənləşdirilməsində vahid yanaşmanın tətbiqi vacibdir. Onun sözlərinə görə, şəhərlərarası səfərlərdə yalnız şəhərdaxili tarif deyil, sürücünün geri dönüş zamanı qarşılaşdığı xərclər də nəzərə alınmalıdır.Digər nəqliyyat eksperti Yasin Mustafayev isə qeyd edib ki, tətbiq olunan məhdudiyyətlərin əsas məqsədlərindən biri Bakıda taksi sayını və nəqliyyat sıxlığını azaltmaqdır. Onun sözlərinə görə, əvvəllər paytaxtda təxminən 75 min taksi fəaliyyət göstərirdisə, hazırda bu rəqəm əhəmiyyətli dərəcədə azaldılıb və sayın daha da aşağı salınması planlaşdırılır.Ekspert hesab edir ki, ətraf rayonlarda və Sumqayıtda qeydiyyatda olan taksilərin Bakıda sərbəst fəaliyyət göstərməsinə icazə verilməsi paytaxtda nəqliyyat sıxlığının yenidən artmasına səbəb ola bilər. O bildirib ki, hazırkı nəqliyyat siyasətinin əsas istiqamətlərindən biri insanların fərdi nəqliyyat vasitələrindən və taksidən daha çox ictimai nəqliyyata yönləndirilməsidir.
