Ağdərədə tapılan sümük qalıqları 1992-ci ildə itkin düşən ailəyə aid ola bilər
Ağdərə rayonunun Baş Güney kəndində insana məxsus olduğu ehtimal edilən sümük qalıqları aşkar edilib.
ELPRESS.az Qafqazinfo-ya istinadən verdiyi məlumata görə, qalıqlar kənd sakini Bəxtiyar Əsgərovun ailəsinə məxsus evdə apardığı axtarışlar zamanı üzə çıxıb.İlkin ehtimallara əsasən, sümük fraqmentləri 1992-ci ildə itkin düşmüş Qəribovlar ailəsinin üzvlərinə aid ola bilər.Xatırladaq ki, 1992-ci il martın 12-də Baş Güney kəndinin işğalı zamanı ailənin beş üzvü – Balay Qəribov, həyat yoldaşı Saray İsmayılova, qızları Zabilə və Ramilə Ələsgərovalar, həmçinin nəvəsi Nərgiz Xudaverdiyeva itkin düşüb. Onların taleyi ilə bağlı indiyədək dəqiq məlumat əldə edilməyib.Ailənin sağ qalan yeganə üzvü Bəxtiyar Əsgərov uzun illərdir yaxınlarının aqibətinin müəyyənləşdirilməsi istiqamətində araşdırmalar aparır.Aşkarlanan qalıqlar aidiyyəti qurumlar tərəfindən götürülərək ekspertizaya göndərilib. Onların kimə məxsus olduğu məhkəmə-tibbi və DNT analizlərinin nəticələrindən sonra müəyyənləşəcək.
