Xırdalan və ətraf qəsəbələrdə tullantı sularının idarə olunması üçün yeni kollektor və təmizləyici qurğu tikilir
Elpress.az xəbər verir ki, Müşfiqabad hövzəsində kanalizasiya infrastrukturunun yenilənməsi istiqamətində layihənin icrası davam etdirilir.Layihə çərçivəsində gətirici kanalizasiya kollektorunun və tullantı sutəmizləyici qurğunun inşası həyata keçirilir. Yeni sistem Xırdalan şəhəri ilə yanaşı, 28 May, Müşfiqabad, Hökməli və Aşağı Güzdək qəsəbələrində yaranan tullantı sularının vahid şəbəkə vasitəsilə toplanaraq daşınmasına və müasir texnologiyalarla təmizlənməsinə imkan verəcək.İnfrastrukturun istifadəyə verilməsi Ceyranbatan Su Anbarının ətrafında qrunt sularının tənzimlənməsinə, subasma ehtimalının azaldılmasına və ərazidə sanitar şəraitin yaxşılaşdırılmasına şərait yaradacaq. Layihənin ekoloji təhlükəsizliyin gücləndirilməsinə də töhfə verməsi gözlənilir.Tikinti işlərinin 2028-ci ildə başa çatdırılması planlaşdırılır. Layihə tamamlandıqdan sonra kanalizasiya kollektoru, sutəmizləyici qurğu, texnoloji hovuzlar, mühəndis sistemləri və digər yardımçı obyektlər vahid infrastruktur kompleksi kimi fəaliyyət göstərəcək.
