Kosmetik məhsulların istifadəsi zamanı yararlılıq müddəti və gigiyenik qaydalara diqqət edilməlidir
Elpress.az xəbər verir ki, Səhiyyə Nazirliyi Respublika Sanitar-Karantin Mərkəzinin həkim-gigiyenisti Orxan İsmayılov kosmetik vasitələrdən istifadə zamanı diqqət edilməli vacib məqamları açıqlayıb.Mütəxəssis bildirib ki, saxta məhsullardan qorunmaq üçün ilk növbədə kosmetik vasitələrin yararlılıq müddəti, qablaşdırılması və gigiyenik sertifikatı yoxlanılmalıdır. Qablaşdırmada göstərilən “6M/12M” işarələri isə məhsul açıldıqdan sonra onun neçə ay ərzində təhlükəsiz istifadə edilə biləcəyini göstərir.Tərkibində paraben, sulfat və sintetik ətir olan, eləcə də istilik altında saxlanılan kosmetik vasitələrdən uzaq durmaq tövsiyə olunur. Ucuz və saxta məhsullarda qurğuşun, civə kimi ağır metalların olması isə sağlamlıq üçün təhlükə yarada bilər.Həkim həmçinin kosmetik vasitələrin başqaları ilə paylaşılmasının yolverilməz olduğunu vurğulayıb. Ortaq istifadə edilən tuş və göz qələmləri göz infeksiyalarının, dodaq boyaları herpesin, makiyaj fırçaları isə müxtəlif infeksiyaların yayılmasına səbəb ola bilər.
