Şəmkirçay su anbarındakı kompleks Gəncə, Şəmkir və Samuxun içməli su təminatında mühüm rol oynayır
Elpress.az xəbər verir ki, Şəmkirçay su anbarında formalaşan su ehtiyatları həm kənd təsərrüfatının suvarılmasında, həm də ölkənin qərb bölgəsində əhalinin içməli su ilə təminatında mühüm əhəmiyyət daşıyır. 2014-cü ildə istifadəyə verilən su anbarının ümumi tutumu 164 milyon kubmetrdir.Su anbarının yaxınlığında yerləşən Şəmkirçay Sutəmizləyici Qurğular Kompleksi saniyədə 1,6 kubmetr su emal etmək gücünə malikdir. Kompleks 2020-ci ilin martında istifadəyə verilib və burada suyun təmizlənməsi üçün 7 qum süzgəcindən ibarət sistem fəaliyyət göstərir. Hər bir süzgəc saatda 800 kubmetr suyun emalını təmin edir.Təmizləmə mərhələsində su əvvəlcə iri hissəciklərdən ayrılır, daha sonra zərərsizləşdirilərək süzgəclərdən keçirilir. Emal olunmuş su yenidən zərərsizləşdirildikdən sonra ümumi tutumu 7 500 kubmetr olan üç su anbarında toplanır və istehlakçılara ötürülür.Kompleksdə suyun keyfiyyətinə xüsusi nəzarət edilir. Burada bulanıqlıq, qalıq xlorun səviyyəsi, hidrogen göstəricisi, temperatur və elektrik keçiriciliyi kimi əsas parametrlər mütəmadi yoxlanılır. Süzgəclərin yuyulması prosesi isə avtomatlaşdırılmış SCADA sistemi vasitəsilə idarə olunur.Qurğunun fasiləsiz fəaliyyətini təmin etmək üçün ümumilikdə dörd su nasosu və iki kompressor quraşdırılıb. Onlardan üç nasos daimi istismar üçün, biri isə ehtiyat məqsədilə nəzərdə tutulub.Kompleksdən təmizlənən suyun müxtəlif yaşayış məntəqələrinə çatdırılması üçün geniş magistral su kəməri şəbəkəsi yaradılıb. Gəncə şəhərinə 27,5 kilometr, Şəmkir şəhərinə isə 17,5 kilometr uzunluğunda su kəmərləri çəkilib. Samuxun içməli su təminatının yaxşılaşdırılması üçün də Gəncə su anbarından şəhərə 10 kilometrlik magistral xətt inşa olunub. Bundan əlavə, Samux və Göygöl rayonlarının bir sıra kəndlərinin su təchizatını yaxşılaşdırmaq üçün həmin xəttdən çıxışlar yaradılıb.Beləliklə, Şəmkirçay Sutəmizləyici Qurğular Kompleksi Gəncə, Şəmkir və Samux şəhərlərinin, eləcə də ətraf yaşayış məntəqələrinin içməli su ilə təminatında mühüm infrastruktur obyektlərindən biri kimi fəaliyyət göstərir.
