Elpress.az -a daxil olan məlumata görə, İdarə Milli Hidrometeorologiya Xidmətinin proqnozuna istinad edərək bildirib ki, may ayının 25-26-da Bakı, Abşeron yarımadası və respublikanın bir sıra regionlarında müntəzəm olmayan güclü yağış, leysan, şimşək və şiddətli külək gözlənilir.
Bəzi ərazilərdə yağıntının qısa müddət ərzində kəskin güclənməsi, dolu, dağlıq zonalarda isə qar yağması istisna edilmir.Vurğulanıb ki, bu cür hava şəraiti yol hərəkəti üçün ciddi təhlükə yaradaraq qəzaların baş vermə ehtimalını yüksəldir. Bununla əlaqədar Baş Dövlət Yol Polisi İdarəsi yolun bütün iştirakçılarına daha sayıq olmağı tövsiyə edir: “Sürücülər sürəti yol və hava şəraitinə müvafiq şəkildə tənzimləməli, nəqliyyat vasitələri arasındakı məsafəni artırmalı, ani manevr və lazımsız ötmələrdən uzaq durmalıdırlar. Görünüşün pisləşdiyi şəraitdə işıqlandırma avadanlıqlarından düzgün istifadə olunmalı, uzaq işıq əks istiqamətdən gələn sürücülərə maneçilik törətməməlidir. Piyadalar yolu yalnız nəzərdə tutulmuş yerlərdən keçməli, zəif görünmə şəraitində isə xüsusilə diqqətli hərəkət etməlidirlər. Küləkli havada moped, motosiklet və skuter istifadəçiləri daha ehtiyatlı olmalı, imkan daxilində hərəkətlərini məhdudlaşdırmalıdırlar. Belə nəqliyyat vasitələrinin güclü külək şəraitində idarə edilməsi çətinləşir və aşma riski artır. Yadda saxlayaq ki, hər bir məsuliyyətli davranış yol-nəqliyyat hadisələrinin öngünlənməsinə töhfə verir.”
