Qran-pridən sonra mərkəzi küçələr sürücülərin istifadəsinə verilib
Elpress.az xəbər verir ki, Formula 1 Azərbaycan Qran-prisi 2026 başa çatdıqdan sonra Bakı Şəhər Halqasının keçdiyi küçələrdə nəqliyyatın hərəkəti mərhələli şəkildə bərpa olunub.Yarışın yekunlaşmasının ardından şəhər halqasının infrastrukturu və Azneft dairəsində quraşdırılmış tribunaların sökülməsi işlərinə başlanılıb. İşlərin aparılması ilə yanaşı, mərkəzi küçələr də nəqliyyatın istifadəsinə qaytarılıb.Yarış marşrutunun bəzi hissələrində tətbiq olunan məhdudiyyətlər bu gün saat 00:00-dan etibarən aradan qaldırılıb. Saat 12:30-dan etibarən isə Üzeyir Hacıbəyli və Puşkin küçələrinin kəsişməsindən Zərifə Əliyeva və Puşkin küçələrinin kəsişməsinədək olan hissə istisna olmaqla, digər yollarda hərəkət tam bərpa edilib.Qeyd olunub ki, Qran-pri həftəsində şəhərin mərkəzində nəqliyyatın daha rahat təşkili üçün əlavə tranzit imkanları yaradılıb. Səhər və axşam saatlarında əsas istiqamətlər üzrə müəyyən dəhlizlər açıq saxlanılaraq sürücülərin və şəhər sakinlərinin hərəkəti asanlaşdırılıb.2026-cı ildə nəqliyyat imkanlarının daha da genişləndirilməsi məqsədilə ilk dəfə Üzeyir Hacıbəyli və Puşkin küçələrinin kəsişməsindən Bülbül prospekti istiqamətində yeni tranzit dəhliz təşkil edilib.
