Moskvanın hərbi mövqelərinin zəifləməsi Ankara üçün yeni imkanlar yaradır, İsrail isə Türkiyənin artan təsirindən narahatdır
Elpress.az xəbər verir ki, Rusiyanın Suriyadakı hərbi mövcudluğunu azaltması bölgədə yeni geosiyasi vəziyyət formalaşdırır. Moskvanın avqustun 9-dan etibarən Hmeymim və Tartusdakı hərbi obyektləri Suriyaya təhvil verməsi Türkiyənin bölgədəki mövqelərini gücləndirməsi üçün imkan yaradan amil kimi qiymətləndirilir.Məlumata görə, NATO mənbələri Tartus hərbi bazasının iyun ayından etibarən boş olduğunu bildirir. Bununla yanaşı, Rusiya tərəfi hərbi əməkdaşlığın davam etdiriləcəyini açıqlayır və bəzi şəxsi heyətin bölgədə qala biləcəyinə işarə edir.Rusiyanın Suriyada 55 il davam edən hərbi-siyasi mövcudluğunun zəifləməsi fonunda Türkiyənin bölgədəki təsirinin artdığı qeyd olunur. Əsəd rejiminin devrilməsindən sonra Suriyanın yeni hökumətinin Ankara ilə yaxın hərbi əməkdaşlıq qurduğu və Türkiyənin Suriyanın hərbi imkanlarının bərpasında rol oynadığı bildirilir.İsrail isə Suriyanın cənubunda yerləşən qüvvələrinə qarşı mümkün hücumların qarşısının alınmasını və Türkiyənin bölgədə İsrail üçün potensial təhlükə yarada biləcək hərbi mövqelər əldə etməsinin qarşısını almağı əsas narahatlıqları sırasında görür.Rusiyanın Suriyadan və daha geniş şəkildə Yaxın Şərqdən geri çəkilməsi İsrail üçün müəyyən diplomatik və hərbi üstünlüklər yaratsa da, bu prosesin Türkiyənin təsir dairəsində olan Suriyanın formalaşmasına şərait yaratdığı vurğulanır.
