Qazaxıstan Rusiya vətəndaşları üçün elektron giriş icazəsi tətbiq edir
Elpress.az xəbər verir ki, Qazaxıstan Rusiya vətəndaşlarının ölkəyə giriş qaydalarını dəyişir. Yeni tələblərə əsasən, rusiyalıların Qazaxıstana səfər etməzdən əvvəl elektron giriş icazəsi əldə etməsi tələb olunacaq. Bununla bağlı müvafiq sənədi Qazaxıstan Prezidenti Kasım-Jomart Tokayev imzalayıb.Əcnəbi vətəndaşlar üçün nəzərdə tutulan QazETA elektron giriş icazəsi sistemi ilkin mərhələdə pilot rejimdə fəaliyyət göstərəcək. Giriş zamanı şəxsin sistemdə qüvvədə olan icazəsinin olmadığı müəyyənləşdirilərsə, onun ölkəyə buraxılmaması üçün əsas yaranacaq.Yeni qaydaların tətbiqi mərhələli şəkildə həyata keçiriləcək. Noyabrın 1-dən beynəlxalq reyslərlə Qazaxıstana gələn Rusiya vətəndaşları elektron icazə təqdim etməli olacaqlar.Noyabrın 15-dən Avrasiya İqtisadi İttifaqına daxil olmayan ölkələrlə sərhədlərdən avtomobillə gələn rusiyalılar, noyabrın 30-dan isə Aİİ ölkələri ilə sərhədlərdən avtomobillə daxil olan şəxslər üçün bu tələb qüvvəyə minəcək. Dekabrın 15-dən etibarən isə qatar və dəniz limanları vasitəsilə Qazaxıstana səfər edən Rusiya vətəndaşları da elektron giriş icazəsi almalı olacaqlar.Elektron icazə 180 gün ərzində qüvvədə olacaq və bu müddət ərzində onun sahibi Qazaxıstana bir neçə dəfə səfər edə biləcək.
