Latın Amerikasında şəhərlərdə yaşayan insanların 30 faizdən çoxu əlverişsiz mənzil şəraitində məskunlaşıb.
Elpress.az-ın Apa.az-a istinadən verdiyi məlumata əsasən Bakıda təşkil olunan Dünya Şəhərsalma Forumunun (WUF13) “Yerli fəaliyyətin gücləndirilməsi: adekvat mənzil təminatı və dayanıqlı icmalar üçün çoxtəbəqəli idarəetmənin möhkəmləndirilməsi” mövzusunda keçirilən dəyirmi masada Argentinanın Quilmes şəhərinin meri Mayra Mendoza çıxış edib.O bildirib ki, Latın Amerikası regionunda milyonlarla insan sıx yaşayış şəraiti, içməli su çatışmazlığı və sosial-şəhər infrastrukturunun yetərsizliyi ilə qarşılaşır.Mayra Mendoza mənzil təminatının insan hüququ olduğunu vurğulayaraq, bunun imtiyaz deyil, dövlət və cəmiyyət tərəfindən qorunmalı olan əsas hüquqlardan biri sayıldığını qeyd edib.Onun fikrincə, regionda urbanizasiyanın sürətlənməsi və sosial bərabərsizliyin dərinləşməsi mənzil problemini daha da ağırlaşdırır.Quilmes meri həmçinin iqlim dəyişiklikləri və ekoloji təhlükələrin xüsusilə qlobal cənub ölkələrində yaşayan həssas təbəqələrin vəziyyətinə mənfi təsir göstərdiyini diqqətə çatdırıb.Sonda o qeyd edib ki, adekvat mənzil təminatı sosial ədalətin qorunması və dayanıqlı şəhər inkişafı üçün əsas amillərdən biridir.
