Fransa Prezidenti Emmanuel Makronun hakimiyyəti dövründə ölkədə yaranmış siyasi və iqtisadi problemlər beynəlxalq ekspertlərin diqqət mərkəzində qalmaqda davam edir.
Elpress.az xəbər verir ki, son illərdə parlamentdə yaşanan fikir ayrılıqları, sosial etirazların artması, dövlət borcunun yüksəlməsi və büdcə kəsirinin dərinləşməsi Makron hökumətinə qarşı tənqidləri gücləndirib.
Müşahidəçilərin fikrincə, hökumətin qəbul etdiyi bir sıra qərarlar ölkədə siyasi sabitliyə mənfi təsir göstərib. Xüsusilə parlamentlə icra hakimiyyəti arasında yaranan gərginlik, sosial islahatlara qarşı keçirilən etiraz aksiyaları və iqtisadi çətinliklər Fransanın daxili gündəmini müəyyən edən əsas mövzular sırasındadır.Bununla yanaşı, Fransanın Afrika və Cənubi Qafqaz istiqamətində apardığı xarici siyasətin də gözlənilən nəticələri vermədiyi, bu səbəbdən rəsmi Parisin bəzi bölgələrdə təsir imkanlarının zəiflədiyi bildirilir.
Analitiklər hesab edirlər ki, qarşıdakı dövrdə Makron administrasiyasını həm daxili siyasi sabitliyin bərpası, həm də iqtisadi problemlərin aradan qaldırılması istiqamətində ciddi sınaqlar gözləyir.
