Peskov sanksiyaların Ukrayna nizamlanması üzrə irəliləyişlərə töhfə verməyəcəyini deyib
Elpress.az xəbər verir ki, Kreml ABŞ tərəfindən Rusiyaya qarşı tətbiq edilən yeni sanksiyaların Ukrayna münaqişəsinin nizamlanması istiqamətində irəliləyişə kömək etməyəcəyini açıqlayıb.Rusiya Prezidentinin mətbuat katibi Dmitri Peskov bildirib ki, Moskva ABŞ-ın sanksiyaları ilə bağlı ticarət tərəfdaşları ilə mütəmadi əlaqə saxlayır. Onun sözlərinə görə, tərəfdaş ölkələr mümkün ikinci dərəcəli məhdudiyyətlərin təsirlərini qiymətləndirirlər.Peskov qeyd edib ki, yeni sanksiyaların tətbiqi Rusiya-ABŞ münasibətlərinin yaxşılaşdırılmasına da müsbət təsir göstərməyəcək. O, bu addımların Ukrayna üzrə nizamlanma prosesində daha ciddi irəliləyişlərin əldə olunmasına töhfə verməsinin gözlənilmədiyini bildirib.Kremlin sözçüsü Rusiyaya indiyədək 30 mindən çox müxtəlif sanksiyanın tətbiq edildiyini də xatırladıb. Onun sözlərinə görə, məhdudiyyətlər bazarlara, şirkətlərə, ayrı-ayrı sektorlara və şəxslərə yönəlib.Peskov Rusiyanın sanksiyalara əhəmiyyətli dərəcədə uyğunlaşdığını və onların mənfi təsirlərini azaltmaq üçün müxtəlif mexanizmlər formalaşdırdığını bildirib.
