Bakı şəhər prokurorluğunda cari ilin birinci yarımilinin yekunlarına həsr olunmuş əməliyyat müşavirəsi keçirilib.
Elpress.az xəbər verir ki, müşavirədə cinayətkarlığa qarşı mübarizə, axtarışda olan və xəbərsiz itkin düşmüş şəxslərin tapılması istiqamətində görülən işlər, vətəndaş müraciətlərinə baxılması və prokurorluq orqanlarının fəaliyyətinin səmərəliliyinin artırılması məsələləri müzakirə olunub.
Bildirilib ki, hesabat dövründə Bakı şəhər prokurorluğuna 10 573 müraciət daxil olub, 1 299 vətəndaş qəbul edilib. Onlardan 173 nəfər Bakı şəhər prokuroru tərəfindən qəbul olunub.
Müşavirədə şəhid ailələri, itkin düşmüş şəxslərin yaxınları və sağlamlığını itirmiş vətəndaşların müraciətlərinə təxirəsalınmadan baxılmasının vacibliyi xüsusi vurğulanıb. Eyni zamanda, “Elektron Prokurorluq” informasiya sisteminin tətbiqinin işin operativliyinə müsbət təsir göstərdiyi qeyd olunub.
İclasda ötən illərdən bağlı qalmış qəsdən adamöldürmə cinayətlərinin açılması, cinayətlərin profilaktikasının gücləndirilməsi və daxili işlər orqanları ilə əməkdaşlığın genişləndirilməsi istiqamətində müvafiq tapşırıqlar verilib.
Bakı şəhər prokuroru Elşən Abbasov müşavirəyə yekun vuraraq, cinayətkarlığa qarşı mübarizənin daha da gücləndirilməsi, insan hüquq və azadlıqlarının qorunması istiqamətində fəaliyyətin davam etdiriləcəyini bildirib.
