Azərbaycan Ordusunda gənc əsgərlərin andiçmə mərasimləri keçirilib.
Elpress.az xəbər verir ki, mərasimlər Müdafiə naziri general-polkovnik Zakir Həsənovun təsdiq etdiyi 2026-cı il hazırlıq planına uyğun olaraq avqustun 16-da müxtəlif hərbi hissələrdə təşkil olunub.Tədbirlər hərbi orkestrlərin müşayiəti ilə keçirilib. Əvvəlcə Ümummilli Lider Heydər Əliyevin və Vətən uğrunda şəhid olanların xatirəsi bir dəqiqəlik sükutla yad edilib, ardından Azərbaycan Respublikasının Dövlət Himni səsləndirilib.
Gənc əsgərlər təntənəli şəkildə hərbi and qəbul edərək Vətənə sadiq qalacaqlarına söz veriblər.
Mərasimlərdə çıxış edən hərbi hissə komandirləri və Müdafiə Nazirliyinin nümayəndələri əsgərləri əlamətdar gün münasibətilə təbrik edib, onlara hərbi xidmətdə uğurlar arzulayıblar. Gənc hərbçilərə döyüş hazırlığını daim yüksək səviyyədə saxlamaq, komandir-rəis heyətinin əmr və göstərişlərini vaxtında yerinə yetirmək, silah və texnikanı dərindən öyrənmək tövsiyə olunub.Andiçmə mərasimləri hərbi qulluqçuların tribunanın önündən təntənəli marşla keçidi ilə yekunlaşıb.
Mərasimdən sonra hərbi hissələrdə vətənpərvərlik ruhunda müxtəlif mədəni-kütləvi tədbirlər keçirilib.
