Elpress.az xəbər verir ki, bu ilin yanvar-aprel aylarında Azərbaycana Avropa ölkələrindən 60 min 269 turist səfər edib.
Bu göstərici ötən ilin eyni dövrü ilə müqayisədə 8 faiz çoxdur. Dövlət Turizm Agentliyinin hesabatına əsasən, hesabat dövründə Şərqi Avropa ölkələrindən Azərbaycana 30 min 175 turist gəlib ki, bu da illik müqayisədə 1,4 faiz artım deməkdir.
Region üzrə ən çox turist Ukraynadan gəlib. Belə ki, dörd ay ərzində Ukraynadan Azərbaycana 10 min 544 nəfər səfər edib. Qərbi Avropa ölkələrindən gələn turistlərin sayı isə daha yüksək artım nümayiş etdirib. Yanvar-aprel aylarında bu regiondan ölkəmizə 30 min 94 nəfər səfər edib ki, bu da ötən ilin eyni dövrü ilə müqayisədə 15,5 faiz çoxdur. Qərbi Avropa ölkələri arasında ilk sırada Böyük Britaniya qərarlaşıb.
Hesabat dövründə bu ölkədən Azərbaycana 7 min 416 turist gəlib. Sonrakı yerlərdə Almaniya (7 min 45 nəfər), İtaliya (4 min 314 nəfər), Fransa (1 min 891 nəfər) və İspaniya (1 min 887 nəfər) qərarlaşıb.
Ümumilikdə isə bu ilin ilk dörd ayında Azərbaycana 175 ölkədən 658,1 min əcnəbi və vətəndaşlığı olmayan şəxs səfər edib. Bu göstərici ötən ilin müvafiq dövrü ilə müqayisədə 11 faiz azdır.
