Elpress.az xəbər verir ki, Müdafiə Nazirliyinin İşlər İdarəsində müxtəlif vəzifələrdə çalışmış dörd hərbçi barəsində açılmış cinayət işi üzrə məhkəmə araşdırmasına start verilib.
İş üzrə təqsirləndirilən şəxslər arasında idarənin sabiq rəisi, polkovnik Elnur Süleymanov, polkovnik-leytenant Emin Əliyev, həmçinin Məsud İbrahimov və Pərviz Abdullayev yer alır.Məhkəmə prosesinə Bakı Hərbi Məhkəməsinin sədri Zeynal Ağayev rəhbərlik edir. İlk iclasda təqsirləndirilən şəxslərlə bağlı zəruri məlumatlar dəqiqləşdirilib. Prosesin media üçün qapalı keçirilməsi qərara alınıb.İttihama görə, sabiq nazirlik əməkdaşları 1 milyon manatdan artıq dövlət vəsaitinin mənimsənilməsində suçlanırlar. İttihamlar məhkəmədə təsdiqini taparsa, təqsirləndirilən şəxslər 14 ilədək həbs cəzası ilə üzləşə bilərlər.Məhkəmə onların proses müddətində azadlıqda qalmasını da məqsədəuyğun hesab edib.Növbəti və əsas məhkəmə iclasının oktyabrın 2-də keçirilməsi planlaşdırılır.Elnur Süleymanovun adı bundan əvvəl də Müdafiə Nazirliyindəki xərclərlə bağlı hazırladığı hesabatla ictimaiyyətin diqqətini çəkib. Hesabatda Nəcməddin Sadıkovun xərcləri sırasında 6 dəst armudu stəkan üçün 21 min manat, 80 ədəd çaxır üçün isə 8 min manat vəsait göstərildiyi bildirilmişdi.
Qeyd: Təqsirləndirilən şəxslərin ittiham olunduqları əməllər məhkəmənin qanuni qüvvəyə minmiş hökmü ilə təsdiqlənməyib.
