Tibbi Ərazi Bölmələrinin İdarəetmə Birliyində (TƏBİB) rəhbər vəzifələrdən birində dəyişiklik baş verib.
Elpress.az xəbər verir ki, TƏBİB-in İnzibati idarəetmə departamentinin Satınalma və təchizat şöbəsinin müdiri Aysel Bayramova öz ərizəsi əsasında vəzifəsindən azad olunub.
A.Bayramova bundan sonra fəaliyyətini “Aqualink” şirkətində davam etdirəcək. Müvafiq əmrlə o, şirkətin Satınalma, təchizat və tenderlər şöbəsinin müdiri təyin edilib.
Qeyd edək ki, Aysel Bayramova 2022–2024-cü illərdə Antiinhisar və İstehlak Bazarına Nəzarət Dövlət Agentliyində baş məsləhətçi, 2024–2026-cı illərdə isə TƏBİB-də şöbə müdiri vəzifəsində çalışıb.
“Aqualink” 2010-cu ildən fəaliyyət göstərən Azərbaycan şirkətidir. Şirkətin 50-dən çox beynəlxalq su mühəndisliyi və kimya şirkəti ilə əməkdaşlıq etdiyi, indiyədək 200-ə yaxın iri layihədə iştirak etdiyi bildirilir.
