TƏBİB təcili və təxirəsalınmaz tibbi yardım xidmətinin daha operativ və səmərəli təşkili istiqamətində yeni texnologiyaların tətbiqinə başlayır.
Elpress.az xəbər verir ki, bu məqsədlə TƏBİB və “Azerconnect Group” arasında əməkdaşlıq müqaviləsi imzalanıb.
Müqaviləyə əsasən, “103” Çağrı Mərkəzində süni intellekt əsaslı texnoloji həllər tətbiq ediləcək. Layihə çərçivəsində çağırışların daha dəqiq analiz olunması, hadisə yerinin operativ müəyyənləşdirilməsi və təcili tibbi yardım briqadalarının hərəkət marşrutunun optimallaşdırılması nəzərdə tutulur.
TƏBİB-in İcraçı direktoru Anar Bayramov bildirib ki, həyata keçirilən rəqəmsal transformasiya tədbirləri vətəndaşlara göstərilən tibbi xidmətlərin keyfiyyətini yüksəltməyə, hadisə yerinə çatma müddətini azaltmağa və resurslardan daha səmərəli istifadə edilməsinə imkan verəcək.
“Azerconnect Group”un baş direktoru Emil Məsimov isə qeyd edib ki, əməkdaşlıq çərçivəsində süni intellekt və yeni nəsil rəqəmsal həllərin tətbiqi təcili tibbi yardım xidmətinin daha çevik və vətəndaşyönümlü fəaliyyətinə mühüm töhfə verəcək.
Qeyd edək ki, layihə çərçivəsində “103” xidmətinə daxil olan səsli zənglərin avtomatik təhlili, istifadəçi davranışına uyğun məlumatlandırma və digər innovativ həllərin tətbiqi də planlaşdırılır.
