Diplomatik nümayəndələr universitetdə yaradılan təhsil infrastrukturu ilə tanış olublar
Elpress.az xəbər verir ki, Azərbaycanda akkreditə olunmuş diplomatik korpusun nümayəndələri Qarabağ və Şərqi Zəngəzura təşkil olunan iki günlük səfər çərçivəsində Qarabağ Universitetində olublar.Xarici diplomatları universitetin rektoru Şahin Bayramov qarşılayıb. Rektor qonaqlara ali təhsil müəssisəsinin fəaliyyəti, həyata keçirilən təhsil proqramları, tələbələrin sayı və onlar üçün yaradılan şərait barədə məlumat verib.Bildirilib ki, Qarabağ Universitetində tədris prosesi artıq üçüncü ildir davam edir. Yeni tədris ilinin sentyabrın 15-də başlaması planlaşdırılır. Universitetdə tələbələrin sayı hər il artır. İlk tədris ilində burada mindən çox tələbə təhsil alıb, ikinci ildə onların sayı 2 mini keçib. Cari tədris ilində isə tələbələrin sayının 3 minə yaxınlaşacağı gözlənilir.Diplomatlara universitetdə tələbələr üçün yaradılan sosial və təhsil imkanları barədə də məlumat verilib. Qeyd olunub ki, tələbələr ödənişsiz təhsil alır, yaşayış imkanları ilə təmin edilir, yataqxana və mənzillərdən istifadə edə bilirlər.Universitetdə müasir tədris proqramlarının tətbiq olunduğu və tələbələrin keyfiyyətli təhsil alması üçün müasir infrastrukturun yaradıldığı bildirilib. Eyni zamanda, ali təhsil müəssisəsinin tədris və infrastruktur imkanlarının genişləndirilməsi istiqamətində işlərin davam etdiyi diqqətə çatdırılıb.Qeyd olunub ki, iqtisadiyyat istiqaməti üzrə yeni korpus artıq inşa edilərək istifadəyə verilib. Növbəti illərdə universitet şəhərciyində daha bir neçə yeni korpusun tikilərək istifadəyə verilməsi nəzərdə tutulur.Səfər zamanı xarici diplomatlar Qarabağ Universitetində yaradılmış təhsil infrastrukturu ilə tanış olub, tələbələr üçün yaradılan şərait və ali təhsil müəssisəsinin gələcək inkişaf planları barədə məlumat əldə ediblər.
