Oktyabr ayında Azərbaycan səmasında maraqlı astronomik hadisə müşahidə ediləcək. Drakonid meteor yağışı 6–10 oktyabr tarixlərində görünəcək və onun ən aktiv mərhələsi 9 oktyabr gecəsinə təsadüf edəcək.
Elpress.az xəbər verir ki, Bakı Dövlət Universitetinin Fizika fakültəsinin Astrofizika kafedrasının məlumatına görə, meteor yağışının maksimumu oktyabrın 9-da saat 23:00 radələrində gözlənilir.
Həmin vaxt saat ərzində təxminən 5 meteorun müşahidə olunacağı ehtimal edilir. Drakonidlərin radiantı Əjdaha (Draco) bürcündə yerləşdiyi üçün meteor yağışı bu adla tanınır.
2026-cı ildə bu astronomik hadisənin müşahidəsi üçün şərait xüsusilə əlverişli olacaq. Belə ki, maksimum vaxtı Ayın işıqlanması çox aşağı səviyyədə olacaq və onun işığı meteorların görünməsinə maneə yaratmayacaq. Bakı üzrə yeni Ay oktyabrın 10-da saat 19:50-də baş verəcək.
Mütəxəssislərin bildirdiyinə görə, Drakonid meteor yağışını müşahidə etmək üçün teleskop və ya durbinə ehtiyac yoxdur. Şəhər işıqlarından uzaq, qaranlıq və açıq ərazi seçmək, səmaya geniş bucaq altında baxmaq kifayətdir.
Drakonidlərin mənbəyi Yupiter ailəsinə daxil olan 21P/Giacobini–Zinner kometidir. Təxminən 2 kilometr diametrə malik bu komet Günəş ətrafında dövrünü 6,6 ilə tamamlayır.
Qeyd edək ki, Drakonidlər Şimal yarımkürəsində daha əlverişli müşahidə olunur və onların digər meteor yağışlarından fərqli cəhətlərindən biri axşam saatlarında izlənilməsinin mümkün olmasıdır.
