Elpress.az xəbər verir ki, son günlər “Azərbaycan Dəmir Yolları” QSC-yə (ADY) Bakı-Tbilisi-Bakı marşrutu üzrə saxta biletlərin satışı ilə bağlı vətəndaşlardan çoxsaylı müraciətlər daxil olur.
Şirkətdən bildirilib ki, bəzi turizm şirkətləri və sosial şəbəkə səhifələri qatarda mövcud olmayan yerlər üzrə sərnişinlərə saxta biletlər təqdim edir.
ADY belə hallarla bağlı hüquq-mühafizə orqanlarına müraciət edildiyini və araşdırmaların aparıldığını açıqlayıb. Saxtakarlıqla məşğul olan şəxslərin və sosial şəbəkə səhifələrinin müəyyənləşdirilməsi istiqamətində tədbirlər görülür.
Şirkət xüsusi olaraq qeyd edib ki, Bakı-Tbilisi-Bakı marşrutu üzrə heç bir turizm şirkəti və ya vasitəçi ilə əməkdaşlıq etmir və onlara bilet kvotası ayırmır.
Sərnişinlərə biletləri yalnız ADY-nin rəsmi internet resurslarından, “ADY Mobile” tətbiqindən və dəmiryol kassalarından əldə etmək tövsiyə olunur.
ADY-dən sərnişinlərə xəbərdarlıq: Bakı-Tbilisi-Bakı biletləri ilə bağlı saxtakarlıq
Aysel Əlibəyli
02 Sentyabr 2026 · 17:27
1028 baxış
