Elpress.az xəbər verir ki, Azərbaycanda müntəzəm sərnişin daşımalarında yeni maliyyələşmə modelinin tətbiqinə başlanılıb.
Nazirlər Kabinetinin 31 iyul 2026-cı il tarixli 250 nömrəli qərarı ilə təsdiqlənən qaydalara əsasən, daşıyıcılara göstərdikləri xidmətin keyfiyyətinə və qət etdikləri məsafəyə uyğun subsidiya ödəniləcək.
İlkin mərhələdə 130, 205, 211, 500 və 503 nömrəli marşrutlar “brutto müqavilə” sisteminə daxil edilib. Tələblərə uyğun olaraq digər müntəzəm marşrutların da mərhələli şəkildə bu modelə qoşulması nəzərdə tutulur.
Yeni mexanizm çərçivəsində avtobusların sayı, hərəkət intervalı, qət ediləcək məsafə və digər xidmət göstəriciləri əvvəlcədən müəyyənləşdiriləcək. Daşıyıcı isə sərnişin sayından asılı olmayaraq, müəyyən edilmiş tələblərə uyğun xidmət göstərdiyi halda ödəniş alacaq.
Bu yanaşmanın xüsusilə sərnişin axınının az olduğu saatlarda, o cümlədən axşam vaxtlarında avtobusların qrafik üzrə fəaliyyət göstərməsinə imkan yaradacağı bildirilir.
Yeni modelin tətbiqi ilə daşıyıcıların yalnız daha çox gəlir gətirən marşrutlara üstünlük verməsinin qarşısının alınması, şəhərətrafı və nisbətən azrentabelli xətlərdə xidmət səviyyəsinin yüksəldilməsi gözlənilir.
Bundan başqa, sistem daşıyıcıların fəaliyyətinə nəzarətin gücləndirilməsinə də şərait yaradacaq. Xidmət keyfiyyəti üzrə müəyyənləşdirilmiş tələblərə əməl edilmədiyi halda müqavilə çərçivəsində maliyyə və digər təsir mexanizmlərinin tətbiqi mümkün olacaq.
Xüsusi proqram təminatı vasitəsilə avtobus daşıyıcılarının göstərdiyi xidmətlərin keyfiyyətinin qiymətləndirilməsi və marşrutlar üzrə xidmətin təşkilinə nəzarət həyata keçiriləcək.
