Azərbaycan Cüdo Federasiyası Hidayət Heydərovun çəki problemi və sosial media paylaşımı ilə bağlı danışıb
Elpress.az xəbər verir ki , Azərbaycan Cüdo Federasiyasının icraçı vitse-prezidenti Rəşad Rəsullu olimpiya çempionu Hidayət Heydərovun son vaxtlar gündəmə gələn çəki problemi və sosial şəbəkə paylaşımı ilə bağlı açıqlama verib.Rəsullu bildirib ki, federasiya üçün nizam-intizam əsas prinsiplərdən biridir və bu qaydalar həm idmançılara, həm də qurumun bütün əməkdaşlarına şamil olunur. Onun sözlərinə görə, Hidayət Heydərov iki dəfə yarış öncəsi çəkisini tənzimləyə bilmədiyi üçün hər iki halda müvafiq qaydada cəzalandırılıb.İcraçı vitse-prezident qeyd edib ki, baş verən hadisələrin səbəbləri federasiya tərəfindən araşdırılıb, lakin bu barədə ictimaiyyətə ətraflı məlumat vermək istəmədiklərini bildirib. Bununla yanaşı, o vurğulayıb ki, Hidayət Heydərovun gələcəkdə yenidən olimpiya və dünya çempionu olmaq üçün kifayət qədər böyük potensialı var.Rəşad Rəsullu idmançının Instagram hesabında etdiyi müzakirələrə səbəb olan paylaşıma da münasibət bildirib. O deyib ki, belə paylaşım edilməməli idi, lakin idmançının tez-tez təhqirlərə məruz qalmasının da nəzərə alınmalı olduğunu vurğulayıb. Federasiya rəsmisi əlavə edib ki, gələcəkdə Hidayət Heydərovdan daha peşəkar davranış sərgiləməsi tələb olunacaq.
