Azərbaycan bazarların əlaqələndirilməsi, iqtisadiyyatın şaxələndirilməsi və dayanıqlı inkişafın təmin olunması istiqamətində ardıcıl siyasət həyata keçirir.
Elpress.az xəbər verir ki, Bu fikirləri Qara Dəniz Ticarət və İnkişaf Bankının (QDTİB) prezidenti Sərhat Köksal Bakıda keçirilən QDTİB Rəhbərlər Şurasının 28-ci İllik Toplantısı çərçivəsində təşkil olunan Biznes Forumda səsləndirib. Onun sözlərinə görə, Azərbaycanın karbohidrogen ehtiyatlarından asılılığın azaldılması, qeyri-neft sektorunun inkişafı, sahibkarlığın təşviqi və regional əlaqələrin gücləndirilməsi istiqamətində həyata keçirdiyi islahatlar ölkədə investisiya və əməkdaşlıq üçün yeni imkanlar yaradır.
Sərhat Köksal bildirib ki, QDTİB ilə Azərbaycan arasında əməkdaşlıq artıq 20 ildən çoxdur qarşılıqlı etimad, ortaq məqsədlər və özəl sektorun inkişafına əsaslanan tərəfdaşlıq prinsipləri üzərində formalaşıb.O qeyd edib ki, bu müddət ərzində Bank maliyyə institutları, istehsal, ticarət, energetika və digər sahələri əhatə edən çoxsaylı layihələri maliyyələşdirərək yeni iş yerlərinin yaradılmasına, rəqabətqabiliyyətliliyin artırılmasına və dayanıqlı iqtisadi artımın dəstəklənməsinə mühüm töhfə verib.
QDTİB prezidenti Biznes Forumun yeni tərəfdaşlıqların qurulması, investisiya imkanlarının dəyərləndirilməsi və işgüzar əlaqələrin genişləndirilməsi baxımından mühüm platforma olduğunu vurğulayaraq, tədbirin Azərbaycanın gələcək iqtisadi inkişafına əlavə töhfələr verəcəyinə əminliyini ifadə edib.
