Azərbaycan, Türkiyə və Gürcüstan hərbçilərinin iştirak etdiyi təlim üzrə yekun konfrans keçirilib
Elpress.az xəbər verir ki, Azərbaycan, Türkiyə və Gürcüstan hərbi qulluqçularının iştirakı ilə keçiriləcək “Eternity-2026” kompüter dəstəkli komanda-qərargah təliminə hazırlıq çərçivəsində yekun planlaşdırma konfransı keçirilib.Müdafiə Nazirliyindən verilən məlumata görə, üç ölkə arasında hərbi əməkdaşlıq planına uyğun təşkil olunan görüşdə qarşıdakı təlimin əsas istiqamətləri və fəaliyyət planı nəzərdən keçirilib.Konfrans zamanı təlim ssenarisi, nəzərdə tutulan taktiki tapşırıqlar, eləcə də iştirakçı şəxsi heyətin logistika və digər təminat məsələləri üzrə razılıq əldə olunub.“Eternity-2026” təliminin əsas məqsədi mümkün təhlükələr zamanı üç ölkənin hərbi bölmələri arasında koordinasiyanın və qarşılıqlı fəaliyyət imkanlarının gücləndirilməsidir. Təlim çərçivəsində region üçün strateji əhəmiyyət daşıyan iqtisadi və enerji infrastrukturlarının, nəqliyyat dəhlizlərinin və digər beynəlxalq layihələrin təhlükəsizliyinin təmin edilməsinə yönəlmiş birgə tədbirlərin planlaşdırılması nəzərdə tutulur.Konfransın yekununda təlim üzrə tapşırıqlar tam razılaşdırılıb və hazırlıq mərhələsinin başa çatdığı bildirilib. Görüşün sonunda yekun protokol imzalanıb.
